ዋዜማ ራዲዮ- በሶስት አዳዲስ ዳኞች የተሰየመው የፌደራሉ ከፍተና ፍርድ ቤት ልደታ ምድብ 4ኛ ወንጀል ችሎት የቀድሞ የሶማሌ ክልል ፕሬዝዳንት አብዲ ሞሀመድ (አብዲ ኢሌ)፣ የክልሉ የቀድሞ ሴቶች እና ህፃናት ጉዳይ ቢሮ ሀላፊ የነበሩትን ወ/ሮ ረሀማ እና በክስ መዝገቡ የተካተቱ ሌሎች 47 ግለሰበችን ጉዳይ ተመልክቷል፡፡

የፌደራል ጠቅላይ አቃቤ ህግ ጥር 20 2011 ዓም በመሰረተው ክስ የክልሉን ከፍተኛ አመራሮች ጨምሮ 47 ግለሰቦች በክልሉ በተለያዩ ስብሰባዎች እና በፌስቡክ ቅስቀሳ በማድረግ እና በጦር መሳርያ በመታገዝ ከሀምሌ 26-30 2010 ዓ.ም ባለው ጊዜ ውስጥ ለጠፋው የ59 ሰዎች ህይወት አብያተ ክርስትያናት መቃጠል እና ለበርካታ ሴት ልጆች መደፈር ተጠያቂ ናቸው ማለቱ ይታወሳል፡፡

ከ47ቱ ውስጥ 15ቱ በችሎት የቀረቡ እና 7 እስካሁን እየተፈለጉ ያሉ ተከሳሾ ያሉ ሲሆን ቀሪዎቹ ግን ጉዳያቸው በሌሉበት እንዲታይ ችሎቱ ከዚህ ቀደም ወስኖ ነበር፡፡

ረቡዕ ጥቅምት 19 ችሎቱ ሲሰየም የአቶ አብዲ ሞሀመድን የእምነት ክህደት ቃል የተቀበለ ሲሆን ተከሳሹ ወንጀሉን አልፈፀምኩም ጥፋተኛም አይደለሁም ካሉ በኋላ በዝርዝር ሀሳባቸውን እንዲገልፁ ችሎቱን ጠይቀዋል፡፡

ችሎቱ ፈፅሜያለው ወይም አልፈፀምኩም የሚለውን ብቻ ለጊዜው ግለፁ ያላቸው ቢሆንም ጠበቆች የደምበኛቸው ሀሳብን የመግለፅ መብት እንዲከበር መጠየቃቸውን ተከትሎ አቶ አብዲ አቤቱታቸውን አሰምተዋል፡፡

በቀዳሚነት የተከሰሱበትን ጉዳይ በመጥቀስ የጀመሩት አቶ አብዲ እኔ ከ10 አመት በፊት ይህን ክልል ለማስተዳደር ስረከብ እዛ ያሉ ክርስቲያኖች እንኳን የሀይማኖት በዓል በአደባባይ ሊያከብሩ ቀርቶ በየቤታቸውም አያከብሩም ነበር ታቦት እንኳን በመከላከያ ታጅቦ ነበር የሚወጣው ብለዋል፡፡

ቀጥለውም ” ለክልሉ ያለው ሁለት አማራጭ ወይ እንደዳርፉር የዩኤን ሰላም አስከባሪ ማስገባት ወይም ደግሞ የፌደራል መንግስት እንዲያስተዳድረው ማድረግ ነበር ፤ ነገር ግን እንደ አንድ አመራር ማድረግ ያለብኝን ቀን ከሌሊት ሰርቼ በእኔ ጊዜ የእምነት ነፃነት እንዲኖር አድርጊያለሁ፣ በክልሉ የነበረውን ነገር ፍራቻ ሸሽተው የነበሩ ወደ ቤታቸው እንዲመለሱ ሰርቻለው ፣ ተከብሮ የማያውቀው የመስቀል እና የደመራ በዓል እንዲከበር አድርጊያለው ለዚህ ደግሞ የሶማሌ ህዝብ ምስክሬ ነው” ብለዋል፡፡

አቶ አብዲ አክለውም “እንደአጋጣሚ ሆኖ ግን ከ2008 ዓም ጀምሮ በመላው ሀገሪቱ ከተሰተው የፖለቲካ ምስቅልቅል ጋር ተያይዞ ብዙ ክልሎች ላይ እንደተፈጠረው ያለ ችግር ሶማሌ ክልል ላይ ተፈጠረ፣ አሁንም በተለያዩ ክልሎች ግድያ አለ መፈናቀል አለ ቤተክርስቲያንም እየተቃጠለ ነው ፣ ሀምሌ 26ትም ሶማሌ ክልል ላይ ይሄው ነው፡፡ የተከሰተው እኔ እንኳን እንዲህ ላደርግ በወቅቱ የተሰማኝን ሀዘን በቦታው ቤተክርሲያንም ሄጄ ገልጫለው” ብለዋል፡፡

“እኔ የተባለውን ወንጀል አልፈፀምኩም፣ ተያዘ ተብሎ የተወራውም ትክክል አይደለም ፡፡ እኔ በህግ ትፈለጋለህ ስባል ራሴ ነኝ ደውዬ የት ልምጣ ያልኩት፡፡ የምመራው የፀጥታ አካል እያለ ብቻዬን ነው ና የተባልኩበት ቦታ የየሄድኩት፡፡ ነገር ግን ይህን የሚያውቁ የመንግስት አካላት ዝም ማለታቸው አግባብ አይደለም ፡፡ ነገ በእነሱ ላይም እንደሚደርስ ሊያስቡት ይገባል” ብለዋል፡፡

አቶ አብዲ አጠቃለውም “እኔ ይህን የምናገረው የክልሉ ህዝብ እውነታውን እንዲረዳ ነው፡፡ ሀይል የፈጣሪ መሆኑን አምናለው፡፡ ፍትህ የምጠብቀውም ከአላህ ብቻ ነው የኢትዮጵያ ህዝብ ደግሞ አንድ ቀን እውነታውን ይረዳል” ብለዋል፡፡ [ዋዜማ ራዲዮ]

The post ዝምታን የመረጡ የመንግስት አካላት እነሱም ነገ ይህ እንደሚደርስባቸው ሊያስቡት ይገባል – የቀድሞ የሶማሌ ክልል ፕሬዝዳንት አብዲ ኢሌ appeared first on Wazemaradio.

[…]

ዋዜማ ራዲዮ- ነሀሴ 28 2008 ዓም የቂሊንጦን ማረሚያ አቃጥላችኃል ተብለው ተከሰው ከነበሩ 38 ተከሳሾች ውስጥ የቀሩት 4 ተከሳሾች ጥቅምት 18 ቀን ዓ. ም ፍርድ ቤት ሳይቀርቡ የቅጣት ውሳኔው በማረሚያ ቤት ጉዳይ አስፈጻሚ በኩል ተላከላቸው፡፡ በልደታ ከፍተኛ ፍርድ ቤት በ 4ኛ ወንጀል ችሎት ክሳቸውን ሲከታተሉ የነበሩት 4 ተከሳሾች 31ኛ ተከሳሽ ጌታቸር እሸቴ 32ኛ ቶፊቅ ሽኩር 33ኛ ፍፁም ጌታቸው 34ኛ ሸምሱ ሰይድ ወደ ችሎት ሳይመጡ ቅጣት ፎባቸዋል።

31ኛ እና 33ኛ ተከሳሾች ጌታቸር እሸቴ እና ፍፁም ጌታቸው 11አመት ቅጣት ሲተላለፍባቸው 32ኛ እና 34ኛ ተከሳሾች ቶፊቅ ሽኩር እና ሸምሱ ሰይድ 12 አመት እስራት ተላልፎባቸዋል፡፡

ቤተሰብ በዳኞች ቢሮ በኩል እስረኞች ለምን እዳልመጡ ሲጠይቁ ዳኞች ለታራሚዎች ደህንነት ሲባል እስረኞች እንዳይመጡ የተደረገው ምክንቱ ቅጣቱን ሲሰሙ ስሜታዊ ይሆኑና ከፖሊስ ጋር ግጭት ይፈጥራሉ ስለዚህ ለደህንነታቸው ሲባል ውሳኔው እዛው እንዲደርሳቸው የተደረገው ብለዋል ፡፡ ዳኞች ለቤተሰብ ቅጣቱን በቢሮ ያነበቡ ሲሆን ተከሳሶች ጥፋተኛ በተባሉበት በወንጀል ህጉ አንቀጽ 540 እና 464 (ለ) እርከን 30 ስር ያረፈ ሲሆን በወንጀል ህጉ አንቀጽ 540 ከ5 አመት እስከ 20 አመት የሚያስቀጣ ሲሆን በወንጀል ህጉ አንቀጽ 464 (ለ) ከ5 አመት ያልበለጠ ቅጣት ያስቀጣል ይህንን አመዛዝነን ነው የወሰነው ያሉ ሲሆን ተከሳሾች ይህን ድርጊት ፈጽመው እጃቸው ከተያዙበት ቀን ጀምሮ ፍርዱ ታሳቢ የሚሆን ሲሆን ይግባኝ ማለት ይቻላል ፡፡

ተከሳሾች ምንም አይነት ማቅለያ ያላቀረቡ ቢሆንም ፍርድ ቤቱ የራሱን ቅጣት ማቅለያ ለተከሳሾች የሰጠ ሲሆን ጌታቸር እሸቴ እና ፍፁም ጌታቸው 2 ማቅለያ የቤተሰብ አስተዳዳሪ መሆናቸውን እና ወንጀል ሪከርድ እንደሌለባቸው በማቅለያነት ተዞይላቸዋል፡፡ ቶፊቅ ሽኩር እና ሸምሱ ሰይድ አንድ የቅጣት ማቅለያ ወንጀል ሪከርድ እንደሌለባቸው ተዞይላቸዋል፡፡

The post በቂሊንጦ ማረሚያ ቤት ቃጠሎ ተከሰው የነበሩ ተከሳሾች 11 እና 12 ዓመት ተፈረደባቸው appeared first on Wazemaradio.

[…]