Photo credit Mail and Guardian

ዋዜማ ራዲዮ- ከድምፃዊ ሀጫሉ ሁንዴሳ ግድያ ጋር በተያያዝ በትላንትናው እለት የፌደራል ከፍተኛ ፍርድ ቤት ልደታ ምድብ 2ተኛ የፀረ ሽብር እና የህገ-መንግስት ጉዳዩች ችሎት ቀርባ በተከሰሰችበት አንቀፅ ጥፋተኛ የተባለችው ላምሮት ከማል በ3 ወር እስራት ተፈረደባት።

ተከሳሿ ከዚህ በፊት ተከሳ እንደማታውቅ፣ የልጅ አሳዳጊ መሆኗን እና ከምትኖርበት አካባቢ ሀዘንና ደስታ ላይ ተሳታፊ እንደሆነች የሚገልፅ 3 የቅጣት ማቅለያ እንዳቀረበች በችሎት የተነበበ ሲሆን አቃቤ ህግ በበኩሉ የቅጣት ማክበጃ ያቀረበሲሆን ድርጊቱ የተፈፀመው ለሊት እንደመሆኑ ሟች እርዳታዋን በሚፈልግበት ሰአት እርዳታ ስላላደረገች በቅጣት ማክበጃነት ይያዝልኝ ሲል አቅርቧል ።

የዋዜማ ሪፖርተር እንደዘገበችው ችሎቱም የአቃቤ ህግን የቅጣት ማክበጃ ምክንያታዊነቱን የሚገልፀ ስላልሆነ ውድቅ አድርጌዋለሁ ብሎ በሶስት ወር እስራት እንደትቀጣ ውሳኔ ሰጥቷል።

በመቀጠልም ችሎቱ ተከሳሿ ላለፉት ዘጠኝ ወር ከአስራ አምስት ቀን በማረሚያ ቤት የቆየች ስለሆነና ከቅጣቷ በላይ ስለታሰረች በነፃ እንድትሰናበትና ተከሳሿ በዋስትና ያስያዘችው ንብረት ካለ ተመላሽ እንዲደረግላት ትእዛዝ ሰጥቷል

ተከሳሿ መስከረም 2 ቀን 2013 ከ ሶስት ተከሳሾች ጋር ክስ የተመሰረተባት ሲሆን በመዝገቡ ተከሰው የነበሩት 1ኛ ተከሳሽ ጥላሁን ያሚ በሽብር ክስ እድሜ ልክ ፅኑ እስራት፣ 2ኛ ተከሳሽ ከበደ ገመቹ በግድያ ተሳታፊ እና ገድሎ በመዝረፍ ወንጀል18 አመት እስራት እንዲሁም 3ኛ ተከሳሽ አብዲ አለማየሁ ለፖሊስ መረጃ ባለ መስጠት 6ወር ቀላል እስራት ሀምሌ 27 2013 ቀን እንደተፈረደባቸው ይታወሳል። [ዋዜማ ራዲዮ]

The post በድምፃዊ ሀጫሉ ሁንዴሳ ሁንዴሳ ግድያ ጋር በተያያዝ የተከሰሰችው ላምሮት ከማል 3 ወር እስራት ተበየነባት appeared first on Wazemaradio.

[…]

• በሁለት ወራት ውስጥ መንግስት በመልሶ ግንባታ ላይ ያተኮረ አዲስ በጀት አዘጋጅቶ ያቀርባል

ዋዜማ ራዲዮ- በመንግስትና በሕወሓት አማፅያን መካከል ከአንድ ዓመት በላይ በዘለቀው ጦርነት የተጎዱ ወገኖችን መልሶ ለማቋቋም የሚረዳ የመጀመሪያ ዙር አዲስ በጀት እየተዘጋጀ መሆኑን የገንዘብ ሚንስትሩ አህመድ ሽዴ ይፋ አደረጉ።

የገንዘብ ሚኒስትሩ አህመድ ሽዴ በጠቅላይ ሚኒስትር ጽህፈት ቤት ትላንት በተሰናዳውና “ህልውናን መጠበቅ እድገትን ማዝለቅ” የሚል ስያሜ ባገኘው የአዲስ ወግ ተከታታይ መርሀ ግብር ላይ እንዳሉት በጦርነቱ ሳቢያ የደረሱ ውድመቶችን በዝርዝር የሚያጠና ቡድን ከተለያዩ መስሪያ ቤቶች በተውጣጡ ሙያተኞች መቋቋሙን እና በቡድኑ ጥናት መነሻነት መንግስት ምላሽ እንደሚሰጥ አንስተዋል።

እንደ መነሻ ግን የጦርነቱን ተፈናቃዮች መልሶ ለማቋቋምና የወደሙ ንብትና መሰረተ ልማቶችን ለመተካት የተለያዩ ማእቀፎች ተዘጋጅተዋልም ብለዋል ። የመጀመሪያው የድጋፍ ማዕቀፍ 750 ሚሊየን ዶላር ወይም 3.4 ቢሊየን ብር ያህል ተይዞለታል።

አንዱ ማእቀፍ የ400 ሚሊየን የአሜሪካ ዶላር ዋጋ ያለው ሲሆን በአለም ባንክ ድጋፍ የሚተገበር ነው። ሌላኛው የ350 ሚሊየን የአሜሪካ ዶላር የመልሶ ማቋቋሚያ መርሀ ግብር ደግሞ በአደጋ ስጋት ስራ አመራር ኮሚሽን የሚከናወን እንደሆነ ያነሱት የገንዘብ ሚኒስትሩ አቶ አህመድ ሽዴ በቀጣይም ከተለያዩ ሀገራትና ተቋማት ለዚሁ መልሶ ማቋቋሚያ ገንዘብ ይገኛል ተብሎ እንደሚጠበቅ አንስተዋል።

በአጋማሽ አመት ላይ ለህዝብ ተወካዮች ምክር ቤት ቀርቦ በሚጸድቀው የተጨማሪ በጀትም ዋና ትኩረቱ ይኸው በጦርነቱ የተጎዱ ዜጎችን መልሶ ማቋቋምና : የመሰረተ ልማት መልሶ መገንባት መሆኑን ገልጸዋል። የተጨማሪ በጀቱ በሚኒስትር መስሪያ ቤታቸው መዘጋጀቱን ያነሱት አቶ አህመድ መጠኑን ግን አልገለጹም።

ከቅርብ ወራት ወዲህ የተደረገው ጦርነት ያደረሰውን ጉዳት የገንዘብ ሚኒስትሩ ሲገልጹት ባለፉት አምስት ወራት ብቻ ሰብአዊ እርዳታዎችን ለማቅረብ 10 ቢሊየን ብር የወሰደ መሆኑን እንዲሁም መልሶ ማቋቋሙ ከሶስት እስከ አምስት የረዘመ አመታትን ሊፈጅ እንደሚችልም ፍንጭን ሰጥተዋል።

በጦርነቱ ሳቢያ በዚህ አመት የደረሰው ኢኮኖሚያዊ ጫና ከፍ ሊል እንደሚችል ያነሱት ሚኒስትሩ ባለፈው አመት ሀገሪቱ በተመሳሳይ ጦርነት ውስጥ ያሳለፈች ቢሆንም ስድስት በመቶ የአመታዊ አጠቃላይ ምርት እድገት መገኘቱን ገልጸው በዚህ አመት ግን ከባድ ኢኮኖሚያዊ ጫና እንደደረሰ ጠቁመዋል።

መንግስት ኢኮኖሚውን ከጦርነቱ ተፅዕኖ ለማላቀቅ የፖሊሲ ማሻሻያዎችን እንደሚያደርግም ፍንጭ ሰጥተዋል። [ዋዜማ ራዲዮ]

The post በጦርነቱ የተጎዱ ዜጎችን መልሶ ለማቋቋም የ3.4 ቢሊየን ብር የመልሶ ማቋቋም መነሻ ድጋፍ እየተዘጋጀ ነው appeared first on Wazemaradio.

[…]